طبق سهل وسريع للعيزانات مثلي

السلام عليكم..

شلونكم؟.. امس جربت طبق معطتني طريقته صديقتي من زمان بس من زود ماني كسوله

في المطبخ ماسويته الا امس بس

بس تفاجأت شكثر هو سهل وسريع وبسيط وفي نفس الوقت لذيذ..

جربوه وايد مفيد وخصوصا للأيام اللي مش حاطه فبالج شبتسوون.. أو جايين من الدوام تعابه

ومالكم بارض تطبخون بس لازم تطبخون

المقادير:

-دجاجة مسلوقة ونفتتها صغار صغار مثل الشاورما
-بصلتين نقطعهم صغار
-فصين ثوم نقطعهم صغار
-ملعقة صغيرة بهارات مشكلة
-حبتين فلفل أخضر بارد مقطعين صغار
-علبة قشطة
-علبة فطر اللي مقطع شرايح
-3 ملاعق جبن سائل
-نص كاس مازوريلا مبشورة

الطريقة:
-نحط الدجاج المفتت كطبقة اولى في صينية البايركس
-نشوح البصل في زيت وبعدين نحط عليه الثوم والفلفل البارد والفطر ونحرك شوي وعقب نحط البهارات ونتم نحرك ونقلب لمدة دقيقتين أو 3..
-نشيل هالخلطة من عالنار ونحطها فوق الدجاج كطبقة ثانية
-نخلط القشطة والجبن في الخلاط ونحط الخليط فوق طبقتين الدجاج والخضرة
-نرش من فوق جبنة المازوريلا.. وندخل الطبق الفرن لين تسيح الجبنة..

وهني وعافية على قلوبكم ان شاالله..